Embedded Systems

Embedded Systems

🚶🏻‍♂️️نعتقد مافيش حد فينا الفترة اللي فاتت ما قامش كل شوية وفتح التلاجة ووقف قدامها ورجع تاني من غير ما يعمل حاجة 

ونعتقد بردو أنه مفيش حد فينا والدته ما قالتش ليه :" لو التلاجة بتتكلم كانت اشتكت ".

النهارده بقى هنقول لكم ازاي تخلوا التلاجة تتكلم .. بس ما تشتكيش عادي 😂 

تعالوا نعرف سوا ...

فيه حاجة اسمها Embedded Systems، يعني أنظمة مضمنة، أو مستخبية.. طيب مستخبية فين؟

هقولك جوّه أي جهاز: تلاجة، غسالة، ميكرويڤ، آلة حاسبة.. إلخ.

والنظام ده اللي هو Software مع الجهاز اللي هو Hardware بيعملوا مهمة محددة. 👌🏻 

مثلًا عندك الميكرويڤ ده الـ HW بيكون جواه SW بيضبط شغله، يعني لما الـ User يضغط على زرار معين.. يشتغل لمدة ١٠ ثواني ويقفل، ولما يضغط على زرار تاني.. يشتغل لحد ما الحرارة توصل لـ ٢٠٠ ويقفل.

تمام كده فهمنا أنه لما الـ HW بياخد Action معين مننا بيبدأ ينفذ الـ SW المرتبط بالزرار اللي اتضغط عليه.

ازاي بيعرف بقه درجات الحرارة والوقت؟ 🤔

هقول لك فيه حاجة اسمها Sensors ودي بردو Hardware ليه تاسك معين بيعمله.. يعني في حالة الميكرويڤ بستخدم واحد خاص بالحرارة، بيبعت الدرجات أول بأول للـ SW بتاعك كـ input وأول ما توصل لـ 200 الـ SW يدي أمر أنه خلاص هنقفل الوقتي.

كذلك الوقت بيكون فيه Timer بيظبطه. 🕐 

طيب ده جهاز عادي مش هيحصل كارثة قوي يعني لو حصل خلل أو الـ Timer مش شغال،لكن في Embedded Systems تانية في العربية مثلًا، لو الأمر اللي مفروض يتنفذ اتأخر مقدار قليل بس من الثانية أو حتى اتنفذ بدري شوية.. يبقى ملوش أي لازمة! 🚫 

 زي الـ Airbag في الحوادث مش هتفيد لو فتحت بعد ما اللي بيسوق يخبط في العربية خلاص

» في الحالة دي بيكون اسمه Real Time System عشان الوقت مهم جدًا فيه .

وفيه حالة كمان بنسمع عنها كتير مؤخرًا اسمها Internet of Things (IOT) ودي بردو من أنواع الـ Embedded Systems..

مع إضافة بسيطة أنه الجهاز بيكون متوصل بالـ Wi Fi بالنت يعني، وبيقدر ييعت البيانات اللي بيوصل ليها زي درجة الحرارة فوق كده بدل ما يحتفظ بيها لنفسه، يبعتها ليك على الموبايل مثلًا ويعرفك أنه خلاص الأكل جهز! 🔔

والحالة دي هي اللي هنستخدمها في التلاجة، هنحط Sensor معين في الباب مثلًا ونبرمجه أنه لو فضل مفتوح فترة معينة ابعت رسالة أن الباب مفتوح وحد واقف يفكر قدامها 🚶🏻‍♂️ 

هتقول لي تمام فهمت كل ده، ازاي أصلًا بحط الكود بتاعي وازاي بيتنفذ ويبعت أوامر ويحتفظ بـ Data..

هقول لك بيكون فيه Microcontroller وده كتوضيح يعني زي الكمبيوتر كده بيكون جواه Memory وجواه Microprocessor وشوية Buses تمشي فيهم الـ Data مع Transistors وحاجات HW كأنه كمبيوتر مصغّر.

طيب عشان نعمل احنا نظام من ده لازم نعرف إيه؟

📌 لغة برمجة طبعًا وفي الحالة دي بنستخدم ++C/C لأن بيكونوا قريبين وسهلين على الـ HW أنه يفهمهم بسرعة بدون مجهود.

📌 وشوية OS عشان البرنامج بتاعي يقدر يتعامل ينفذ أي عملية الأول ويـ Process الـ Data المهمة في الوقت المناسب.

📌 وبما أن فيه Hardware يبقى لازم نتعرف على شوية Computer Architecture & Organization.

وبكده نكون عرفنا ازاي التلاجة ممكن تتكلم عادي وماما كالعادة مش بتقول حاجة غلط 😔.